ORDENANZA REGULADORA DO PREZO PÚBLICO POLOS SERVICIOS OFERTADOS NA VIVENDA COMUNITARIA (BOP 264 de 17-11-2003)

Artigo 1.º .-Concepto.

1. De acordo co disposto no artigo 117, en relación co artigo 41, ámbolos dous da Lei 39/88, do 28 de decembro, reguladora das facendas locais, na súa nova redacción dada pola Lei 25/1998, do 13 de xullo, de modificación do réxime legal das taxas estatais e locais e de reordenación das prestacións patrimoniais de carácter público, este Concello establece o prezo público polos servicios ofertados na vivenda comunitaria para persoas maiores.

2. A vivenda contará con 12 prazas para estancia en réxime interno.

Artigo 2.º .-Suxeitos obrigados ó pagamento.

1. Son suxeitos obrigados ó pagamento as persoas físicas usuarios da vivenda comunitaria e que despois de solicita-la admisión lles sexa prestados os servicios polo persoal técnico deste.

Artigo terceiro.-Actividades gravadas.

Ó servicio ofertado para as persoas maiores na vivenda comunitaria consistirá en:

Obrigatorios:

- Administración e recepción de solicitudes.

- Manutención.

- Aloxamento acondicionado.

- Hixiene e lavado de roupa.

- Información e asesoramento.

- Apoio, sanitario.

- Apoio social preciso segundo as necesidades de cada usuario para as actividades da vida diaria.

Outros servicios: os usuarios poderán seguir demandando dos servicios sociais de atención primaria, dos médico-sanitarios así como de calquera outro servicio público ou privado que poida existir fóra da vivenda e dentro do termo municipal ou fóra. Así mesmo, as persoas aloxadas na vivenda compartida poderán participar nas actividades que o Concello organiza para os maiores; (actualmente informática, ximnasia, charlas informativas, proxeccións de películas de vídeo e viaxes culturais).

Artigo 4.º .-Criterios xerais para fixa-lo prezo.

O importe do prezo público fixado cubrirá, como mínimo, o custo dos servicios prestados, podendo sen embargo, fixarse un prezo público por debaixo do custo ou gratuidade do servicio cando en casos puntuais algún solicitante viva nunhas condicións sociais e económicas extremas que así o aconsellen. Estes supostos serán determinados polo pleno a proposta do equipo de Servicios Sociais do Concello.

As contías serán aprobadas atendendo ás propostas-memorias económicas e da actividade que presente o equipo de Servicios Sociais encargados de desenvolve-los servicios.

De non adoptarse actualización expresa do prezo, este verase incrementado na súa contía segundo o IPC do ano en curso.

Para o cálculo dos ingresos tense en conta a pensión, outros tipos de ingresos e¡ou rendas que estea percibindo o solicitante.

Artigo 5.º .-Contía do pagamento.

O prezo público mensual a aboar polos usuarios, será determinado no acto da concesión do servicio.

1. Prezo para o réxime interno dos usuarios na vivenda comunitaria:

Para o ano 2003, a contía polo servicio para as persoas que residan no centro é o 75 por cento da súa pensión, que como mínimo será de 300,41 euros, para os usuarios con habitación dobre (dato calculado lo 75 por cento da contía da pensión mínima do réxime especial agrario) e de 320,41 euros para os usuarios con habitación individual que se irá incrementando segundo o IPC do ano correspondente. Aquelas persoas que o 75 por cento da súa pensión non acade os 300,41 euros ou 320,41 euros, será estimada a súa situación persoal pola Comisión de Goberno a instancia do informe proporcionado polo equipo de Servicios Sociais.

Neste prezo irá incluído tanto a estancia como a manutención na vivenda comunitaria.

2. Os cinco primeiros días de cada mes terán que notificar ó responsable do centro se se dan de alta ou de baixa en algún destes servicios.

3. Suposto de facturación de media mensualidade: ingreso na vivenda comunitaria na segunda quincena do mes e calquera estancia neste que sexa inferior ou igual a 15 días/mes. No casa de baixa voluntaria deberá o usuario preavisar ó centro con cinco días de antelación á data de baixa.

4. No suposto de reserva de praza a hospitalización/vacacións, etc., nos que se superen os cinco días, descontarase do prezo mensual total un dous por cento cada cinco días polos servicios non prestados (manutención, lavado de roupa, etc.). O non pagamento da cantidade correspondente á reserva de praza, determinará o dereito do centro a ocupala, salvo xustificación razoable.

5. Así mesmo, ó inicio do seu ingreso depositarase a cantidade de unha mensualidade en concepto de depósito de fianza.

Artigo 6.º .-Normas de xestión-pagamento.

1. O pagamento (mediante domiciliación bancaria) farase efectivo por mensualidades vencidas nos cinco primeiros días do mes seguinte.

2. Contra o pagamento expedirase o correspondente recibo/factura por duplicado, un para o expediente individualizado custodiado na vivenda comunitaria e outro para entregar ó usuario-cliente. Neste detallaranse os servicios ós que corresponde o pagamento.

Artigo 7.º .-Outras obrigas.

Os usuarios da vivenda comunitaria deberán estar ó día no pagamento das débedas contraídas co Concello de Vilasantar.

Disposición final:

A presente ordenanza entrará en vigor e comenzará a aplicarse ó día seguinte da súa publicación no Boletín Oficial da Provincia, permanecendo vixente ata que se acorde a súa modificación ou derrogación expresa.

Vilasantar, 7 de xullo de 2003.

O alcalde, Xosé Manuel Taboada García.